O obxectivo é reforzar o apoio aos concellos para o seu desenvolvemento na situación económica actual

A Consellería de Economía e Industria, co obxectivo de continuar a facilitar a mellora do subministro eléctrico e o desenvolvemento dos concellos galegos, publica hoxe no Diario Oficial de Galicia unha nova convocatoria da liña de axudas para o soterramento de infraestruturas eléctricas, dotada con 1,6 millóns de euros.

Co obxectivo de pór ao dispor dos municipios galegos as maiores facilidades para o desenvolvemento destas infraestruturas, a porcentaxe de axuda elévase ata o 80% do total do investimento a realizar. Por outra banda, apóiase por primeira vez a obra eléctrica, ademais da obra civil. Ao mesmo tempo, elévase a contía máxima dos investimentos destinados a estes proxectos, que antes soamente podían alcanzar o 5% do orzamento total da liña de axudas e agora poderán chegar ata o 25%.

Ademais, e tendo en conta a situación económica dos concellos, poderanse pagar anticipos de ata o 25% do gasto destes investimentos, para facer posible que os municipios poidan levar a cabo estas obras de mellora, que deberán estar rematadas a finais deste ano.

Coa resolución desta convocatoria da Xunta, cofinanciada con fondos Feder, máis de 85 concellos terán posto en marcha obras de soterramento das liñas eléctricas, cun orzamento total de máis de 12 millóns de euros postos ao dispor dos concellos galegos.

Dende o comezo da lexislatura, a Xunta de Galicia aplicou a máxima transparencia á concesión destes apoios que se convocan, por terceira vez, en réxime de concorrencia competitiva, establecendo uns criterios obxectivos para a concesión das mesmas, nos que se valoran criterios técnicos e sociais como o tipo de actuación, a tensión da liña, a proximidade a centros de interese social ou o número de habitantes dos concellos.

Ademais da mellora da subministración eléctrica, das características técnicas destas infraestruturas e da súa seguridade, estas obras supoñen tamén beneficios sociais que contribúen ao desenvolvemento dos concellos galegos, nun momento no que cómpre reforzar o apoio aos municipios.