A pasada noite dúas das catro barreiras do paso a nivel permaneceron levantadas ao paso dun tren. Nesta ocasión o fallo foi constatado por un membro da Policia Local, e minutos despois a central de ADIF comunicou ao Concello que se detectara un fallo nas barreiras e enviaban ao lugar a operarios para comprobar o seu funcionamento.

“Non  imos permitir que se repitan este tipo de incidentes que poñen en perigo a seguridade das persoas”, asegurou Eva García de la Torre. A alcaldesa subliñou que unha das prioridades do seu goberno é “resolver definitivamente este problema”, e con este obxectivo solicitou unha reunión coa ministra de Fomento, Ana Pastor.

A rexidora falou esta mesma mañá con responsables da Axencia Estatal de Infraestructuras Ferroviarias para “esixir que se depuren responsabilidades e que de forma inmediata ADIF tome as medidas necesarias para garantir a seguridade das persoas”.

A Axencia confirmou a alcaldesa que ten constancia de 5 incidencias nun ano, “un número que lles parece excesivo  e de feito mostránse preocupados non só pola seguridade, senón tamén porque a falta de fiabilidade no sistema fai que non sexa respectado polos viandantes. É dicir, tampouco cumpren a súa función disuasoria. A Axencia abrirá un expediente a ADIF e informará das medidas que adoptará para que non se repitan os fallos”, explica Eva García.

“Non imos permitir, baixo ningún concepto, que os veciños do Porriño sigan sufrindo as consecuencias do paso do tren polo centro urbano, cun sistema de seguridade que non só no é o máis axeitado  senón que ademais está fallando de forma reiterada”, afirma a alcaldesa. Eva García denuncia que “precisamente as obras de mellora realizadas por ADIF  no paso a nivel foron para aumentar a velocidade dos trens, máis que para garantir a seguridade das persoas”.