Efectivos da Policia Local detiveron na mañá do venres ao condutor dun vehículo que se deu á fuga tras provocar presuntamente un accidente na Rúa Tranvía 1, “como consecuencia de manobras de condución temerarias”. O vehículo e o seu condutor, de 20 anos e veciño de Mos, foron localizados na zona de Cans. 

Sobre as 8 da mañá do venres a central da Policía Local do Porriño recibiu varias chamadas de veciños das rúas Enrique Peinador e Tranvía alertando de que un vehículo de cor vermella, tipo rancheira, realizaba manobras temerarias na zona; causando un accidente ao chocar contra dous vehículos estacionados na rúa Tranvía e dándose á fuga. 

Tras realizar unha batida, efectivos da Policia Local localizaron ao vehículo e ao seu condutor na zona de Cans. Instrúense dilixencias xudiciais imputando ao condutor un presunto delito contra a seguridade vial, tanto polos feitos como por dar positivo no control de alcoholemia.