A concellería de Educación e Participación Cidadá mosense que dirixe a edil Kely Monzón, oferta as actividades extraescolares de teatro e baile moderno para os/as nenos de infantil e primaria dende outubro ata maio.

Co obxectivo de proporcionar unha formación saudable a través de actividades de lecer, como base para a promoción dunha boa calidade de vida; preténdese ofertar á poboación máis cativa do concello de Mos, a posibilidade de participar neste tipo de actividades.

A actividade de Baile Moderno terá lugar nas instalacións do Pavillón Óscar Pereiro todos os venres, facéndose dous grupos segundo a idade, co fin de que as clases sexan máis individualizadas. O horario dos/as alumnos/as de 3 a 7 anos será de 16:30-17:30 mentres que os/as nenos/as de 8 a 12 anos recibirán as clases de 17:30-18:30. A actividade terá un custe de 10€ ó mes por participante.

Por outra banda, tamén se ofrece a posibilidade de realizar a actividade extraescolar de Teatro que se impartirá por primeira vez dende esta Concellaría co fin de desenvolver habilidades nos participantes que permitan comunicar sentimentos, opinión e afectos de maneira asertiva así como potenciar a lectura e a expresión oral dunha maneira que os/as nenos/as disfruten coa representación teatral. Dita actividade terá lugar no Multiusos do Concello todos os luns de 16:30 a 18:00 tendo un custe de 12,50€ por neno/a.

Para máis información sobre estas actividades ou outras cuestións relacionadas, poden dirixirse chamando ao teléfono 986.33.94.04 da oficina de Información Xuvenil do Concello.