Un home foi rescatado esta mañá por uns particulares tras caer ao mar cando estaba a pescar na parroquia de Santa María de Oia, no concello pontevedrés de Oia. O home, tras precipitarse á auga, logrou alcanzar unha rocha polos seus propios medios, aínda que non podía chegar á costa. Así o relatou o alertante que informou ao 112 Galicia ao fío das 11:15 horas de hoxe.

 

De seguido, púxose en coñecemento de Salvamento Marítimo, que descartou mobilizar o helicóptero Helimer unha vez confirmado que o home estaba a salvo en terra logo de ser rescatado por uns mariscadores coa axuda dunhas cordas. Así, dende o CAE 112 Galicia solicitouse a presenza de Urxencias Médicas, que enviou unha ambulancia ao lugar. Ademais, foron informados os membros do GES de A Guarda, Servizo de Gardacostas de Galicia e Garda Civil.