Os Bombeiros de Baixo Miño liberaron esta mañá a dous condutores que quedaron atrapados no interior dos vehículos que conducían. O accidente tivo lugar cando os vehículos implicados, dous furgóns e un camión, circulaban polo punto quilométrico 21 da Autovía, dirección Porriño, á altura do Concello de Tui.

Tras recibir a alerta dun particular, ás 08:30 horas de hoxe, o CAE 112 Galicia alertou a Urxencias Médicas e á Garda Civil de Tráfico que, chegados ó punto, comprobaron que eran precisos os Bombeiros para liberar ós condutores dos vehículos accidentados. Urxencias Médicas confirmou que, ademais dos dous condutores atrapados, outra persoa resultou ferida e tivo que ser evacuada polo persoal sanitario. A intervención dos efectivos de Protección Civil de Tui tamén foi requirida polo persoal do 112 Galicia.