Segundo ven de denunciar o Partido Popular “a situación repítese de novo: un despido improcedente pagado co diñeiro de todos os veciños”.

E é que o Concello de Salceda de Caselas foi, recentemente, condenado polo Xulgado do Social número 4 de Vigo ao pagamento de 69.154 euros en concepto de indemnización por cesamento e cotizacións á seguridade social de Rocío González Ocampo, arquitecta que prestaba os seus servizos ao Concello.

O Partido Popular de Salceda de Caselas amosa as “probas da irresponsabilidade e nefasta xestión do Goberno local que volve cometer o mesma feito que fai 5 anos, cando tivo que pagar máis de 23.000 euros polo despido improcedente do entón arquitecto Óscar Freaza. Precisamente, Rocío González foi naquel momento a substituta e agora é ela a ‘vítima’”.

O Concello de Salceda recorreu pero o Tribunal Superior de Xustiza de Galicia deu a razón á arquitecta que a maiores da indemnización por despedimento (15.374,60 euros), solicitou o pagamento das cotización á seguridade social, o que supón 48 cotas (dende decembro de 2009 a decembro de 2013) a 1.111,91 euros/mes, que xunto ao recargo suman un total de 53.779,37 euros.

En resumo, din os populares,  que “pola incorrecta e irresponsable actuación dos actuais gobernantes municipais todos os veciños temos que pagar os case 70.000 euros. E así se certifica no decreto de Alcaldía 222/2015 cuxo asunto indica a modificación orzamentaria 11/15 e recoñecemento da obriga e realización do pago desta sentenza xudicial”.