A Presidenta da Deputación, Carmela Silva, volveu hoxe a insistir na convocatoria urxente dunha  mesa contra a violencia machista na que participen todas as administracións implicadas, o delegado do goberno, as forzas de seguridade e a Xustiza, tras o novo asasinato dunha muller na cidade de Vigo. Silva considera que o Presidenta da Xunta, Alberto Níñez Feijoo, tería que poñerse ao fronte deste iniciativa e impulsar a creación desta mesa.

Carmela Silva, que xa reclamara a creación desta mesa a semana pasada tras o quinto asasinato dunha muller na parroquia de Pontesampaio, considera "imprescindible e urxente" a súa posta en marcha tras o sexto asasinato por violencia machista na provincia. "As Administracións non podemos agocharnos tras a condena. Temos que poñer todos os nosos medios para articular as medidas necesarias que eviten este continuo goteo de asasinatos de mulleres", subliñou Silva.

A Presidenta da Deputación condenou "coa maior repulsa" este novo asasinato e subliñou que "non podemos permanecer impasibles porque nos están a asasinar".

Desde o pasado mes de setembro as vítimas da violencia machista na provincia duplicáronse acadándose a cifra de seis. A nivel nacional son, con esta nova vítima de Vigo, 39 as mulleres asasinadas e outros cinco casos que están a espera de investigación.

Carmela Silva volveu a facer un chamamento a toda a sociedade para acudir as concentracións de repulsa contra este novo acto de violencia contra a muller "por qué é necesario visibilizar e denunciar os asasinatos machistas".

A Presidenta da Deputación anunciou que acudirá aos tres minutos de silencio convocados polo concello de Vigo para mañá.

Mañá venres tamén se convoca un minuto de silencio, a medio día,  nas escaleiras de acceso ao Pazo Provincial da Deputación en Pontevedra.