Dúas persoas resultaron feridas de carácter leve nun accidente rexistrado esta mañá na A-55, en Vigo. No accidente, no que se viron implicados dous turismos, tivo lugar cando un deles envorcou despois de impactar coa mediana da Autovía, á altura de Segade, ao redor do punto quilométrico 4-. Así o relataba o particular que pedía axuda ó CAE 112 Galicia ás 09:00 horas desta mañá. Por iso, de contado, se informou a Urxencias Médicas e aos Bombeiros da cidade que, finalmente, descartaron a excarceración e confirmaron a existencia de dúas persoas feridas de carácter leve. A Garda Civil de Tráfico, Policía Local e Protección Civil tamén foron informados polo 112 Galicia. En Cartelle, sobre as 08:00 horas de hoxe, o CAE 112 Galicia rexistraba outro accidente cunha furgoneta que envorcara na estrada que une Espiñoso e Outomuro, á altura de Ella de Abaixo. O particular que informou ó 112 Galicia, indicou que a persoa estaba consciente pero que precisaban axuda para evacuar ó ferido. Así, o persoal do Centro de Atención ás Emerxencias alertou a Urxencias Médicas e aos Bombeiros de Celanova que, aínda que non chegaron a empregar o material de excarceración, si axudaron a sacar á persoa do vehículo. O ferido foi trasladado polos servizos sanitarios ao centro hospitalario de referencia. A intervención dos axentes de Tráfico e de Protección Civil de Cartelle tamén foi requirida polo persoal do 112 Galicia.