Os servizos sanitarios de urxencia trasladaron ao Hospital Álvaro Cunqueiro de Vigo a unha persoa que se queimou nas mans tras producirse un incendio na súa vivenda. Segundo confirmaron os bombeiros da cidade, o inquilino do terceiro andar do número 60 da Rúa Gregorio Espiño resultou ferido a causa dun lume que comezou na campá extractora da cociña e que encheu de fume todo o apartamento. Os veciños, que empezaron a escoitar berros, contactaron co 112 Galicia para pedir axuda. O persoal do Centro de Atención ás Emerxencias de Galicia avisou de inmediato aos efectivos do parque municipal de bombeiros, así como aos axentes da Policía local e Nacional. Ante a sospeita de que alguén resultase ferido, os xestores do 112 Galicia alertaron, tamén, aos técnicos sanitarios que, finalmente, trasladaron ao inquilino do piso. O CAE 112 Galicia rexistrou o suceso ás 13:40 horas de hoxe.