A alcaldesa de Mos, Nidia Arévalo, a concelleira de Política Social e Cultura, Sara Cebreiro, e a edil mosense de Educación e Participación Cidadá, Kely Monzón, xunto co resto do equipo de goberno local, presentaron hoxe a programación municipal organizada con motivo da celebración, o día 25 de novembro, do Día Internacional contra a Violencia de Xénero, e que persegue o obxectivo fundamental de fomentar a igualdade entre sexos de cara a previr e erradicar calquera tipo de maltrato ás mulleres.

O propio día 25, mércores, terá lugar no salón de actos da Axencia de Colocación a Mesa Local sobre Violencia de Xénero que dará comezo ás 12.30 horas. Esta mesa está constituída por profesionais dos ámbitos xurídico, social, sanitario, educativo, policial, etc. Tamén se invita a participar a outros profesionais, que estean traballado neste tema.

O punto principal da orde do día será unha conferencia por parte de Dª. Maribel del Pozo Triviño, Profesora do Departamento de Tradución e Lingüística da Universidade de Vigo, do tema “As mulleres estranxeiras ante a violencia de xénero” e presentación do proxecto “Speak Out for support SOS – VICS” (guía de boas prácticas para o traballo como intérprete en contextos de violencia de xénero), proxecto centrado na formación de intérpretes cuxa especialidade é o traballo con vítimas estranxeiras de violencia de xénero.

O xoves 26 de novembro ás 19.00 horas realizarase unha actividade no IES de Mos, dirixida ós pais e nais do alumnado do Instituto e tamén de alumnos dos últimos cursos de Educación Primaria, quinto e sexto, concretamente. A iniciativa incluirá unha conferencia seguida de talleres para que os pais debatan e aporten información sobre como identificar situacións de violencia de xénero. Esta charla-taller, titulada “Adolescentes hoxe: home e muller, somos iguais?”, será impartida pola orientadora educativa, psicopedagoga, psicóloga e escritora, Betina Represas Vázquez.

O domingo 29 de novembro haberá dúas actividades, unha matinal e outra vespertina. Pola mañá, ás 11.00 horas impartirase no Pabillón Óscar Pereiro unha clase colectiva de Zumba baixo o título “Móvete contra a Violencia” e pola tarde, ás 18.00 horas representarase no Multiusos das Pozas un espectáculo infantil de música e teatro titulado “Rosa Caramelo”.

A clase colectiva de Zumba vai dirixida a todas as idades e consiste nunha animada proposta para que toda a veciñanza tome conciencia en torno a esta grave lacra social que é a violencia de xénero. Trátase dunha actividade de balde, previa inscrición, ata o xoves 26 de novembro,  na Piscina Municipal ou nos teléfonos: Piscina – Pavillón: 986 33 40 70  /  Departamento de Servizos Sociais: 986 33 72 78.

O espactáculo de música e teatro “Rosa Caramelo” é unha iniciativa para nenas e nenos onde se lle dá a volta aos roles e aos estereotipos de xénero. Nesta montaxe composta de catro historias nas que  se combinan a palabra  e a música en directo, trátase de crear unha atmosfera adecuada para desmontar unha serie de ideas impostas e simplificadas, pero fortemente asumidas, sobre actitudes e aptitudes das mulleres e dos homes. A entrada será totalmente libre e de balde ata completar o aforamento. A actividade vai dirixida a nenos e nenas de 4 a 10 anos.

Sobre a realidade que lamentablemente require da celebración desta data as representantes municipais declararon durante a presentación desta mañá que “a desigualdade entre homes e mulleres existente no nosa sociedade constitúe un dos ataques máis fragantes aos dereitos fundamentais como a liberdade, a igualdade a seguridade e a non discriminación; por iso dende o Concello de Mos vimos realizando ao longo deste anos diferentes actividades encamiñadas á formación dos profesionais,  á prevención e á sensibilización social respecto da gravidade e magnitude deste problema, actividades que se complementan coas que hoxe presentamos incluídas dentro do programa oficial do Día Internacional contra a Violencia de Xénero”.

Así mesmo a edil de Política Social, Sara Cebreiro, insistiu en que “considerando a desigualdade  como o xerme para as situacións de violencia de xénero, e o Concello como a administración más preta á cidadanía, este último convértese no marco de referencia para a loita contra  a desigualdade  e para a prevención e sensibilización en violencia de xénero, de ahí que dende este espazo esteamos a facer realidade multitud plans e programas a prol da prevención e erradicación de todo tipo de violencia contra as mulleres”.