A Xunta de Galicia propón aos Concellos “sentar as bases para iniciar a definición conxunta e consensuada dun mapa de rutas coherente para os aeroportos galegos”. Así se acordou na xuntanza do grupo de traballo, no que están Aena, o Ministerio de Fomento e os Concellos onde existe un aeroporto,  para o desenvolvemento de novos destinos celebrado o pasado día 13 no aeroporto da Coruña e no que tamén participou a directora xeral de Mobilidade, Helena de Lucas.

A representante do Goberno galego expresou a vontade da Administración autonómica de implicarse neste traballo, sempre baixo a premisa do consenso entre todos os concellos de que é necesario que as cidades deixen de competir entre elas en detrimento das finanzas municipais e do interese xeral de Galicia.

Pola súa banda, os representantes dos concellos de Santiago, A Coruña e Vigo comprometéronse a presentar, antes da vindeira xuntanza, os datos das liñas aéreas que operarán en 2016 apoiadas polas respectivas administracións locais. Así mesmo,  manifestaron a súa disposición a remitir as preferencias de destinos para os aeroportos das súas cidades.

Helena de Lucas insistiu en que o Goberno galego “é contrario a apoiar con fondos municipais os destinos aéreos e reclamou que, en todo caso, este tipo de actuacións se transparenten nas xuntanzas de coordinación. Desa forma será posible seguir unha política de promoción turística exterior coherente coas rutas aéreas”.