O Concello de Mos congregou esta tarde ás directivas dos principais clubes deportivos do municipio así coma a unha das deportistas mosenses máis destacadas, Patricia Martínez, para facerlles entrega das axudas económicas que anualmente lles outorga a administración local.

En total repartíronse 27.400 euros en sete subvencións cuxos beneficiarios foron a xa mencionada bailarina Patricia Martínez, o Club de Fútbol Alerta de Sanguiñeda, a Unión Deportiva Mos, o Club Deportivo Louro-Tameiga, o Louredo Club de Fútbol, o Club de Natación Mos, e as Escolas de Patinaxe de Mos.

No acto de entrega estiveron presentes, ademais dos deportistas e entidades deportivas pertinentes, varios representantes municipais entre os que se atopaban a alcaldesa de Mos, Nidia Arévalo, e o concelleiro de Deportes e tenente alcalde, Alberto Méndez.

A rexedora local destacou durante a entrega a implicación do Concello de Mos como promotor da práctica deportiva. “O deporte non só fomenta os hábitos de vida saúdables, senón tamén principios educacionais tales coma o traballo en equipo, o esforzo, o afán de superación, a competitividade sá e o compañeirismo entre rivais; valores tan necesarios e importantes na sociedade actual”, dixo Arévalo. Quen apuntou tamén a este respecto que no orzamento para 2016, recentemente aprobado en Pleno, “pretendemos continuar a fomentar a calidade de vida de cativos, adultos e maiores mediante o incentivo da práctica do deporte. Na partida de Deportes inclúense melloras no Campo de Fútbol das Baloutas e unha obra de mellora e adaptación na Piscina Municipal que conta con máis de 2.000 usuarios ó mes. Deste xeito, en materia de deportes, o Concello de Mos fai un novo esforzo por manter a liña de axudas consignadas así coma o fomento das Escolas Deportivas tanto de fútbol coma de patinaxe, xadrez, natación e baloncesto. Asígnanse subvencións ós deportistas, tanto en equipos como individuais; tal é o caso do Club Louro Tameiga, o Club Fútbol Alerta, a Unión Deportiva Mos, o Club de Xadrez Mos, o Club de Natación Mos, as Escolas de Patinaxe de Mos, o Club Patinaxe Rosaleira, o Club de Baloncesto Mos, a Patricia Martínez e a ciclista Susana Alonso Carballo. Todo isto, xunto co mantemento e mellora da Piscina Municipal e dos pavillóns deportivos, suman unha inversión total en deportes para o vindeiro ano 2016 duns 427.000 euros”.

E é que no presuposto do vindeiro ano increméntase a partida adicada a Deportes para poder continuar a promover a actividade de clubes deportivos, tan importante para o enriquecemento da localidade. Faise un novo esforzo por manter a liña de axudas consignadas, así coma o incremento de outras e introducción de algunhas novas. Deste xeito fomentaranse as Escolas Deportivas e aumentarase a contía das subvencións a algúns deportistas, tanto en equipos como individuais, que están a despuntar na actualidade.

Por último o edil de Deportes, Alberto Méndez, insistiu no apoio do Concello de Mos ó deporte base, “alicerce da actividade deportiva na localidade mosense e futuro da mesma”. “Se temos un deporte base forte, activo e de calidade, o futuro deportivo de Mos será prometedor”, declarou Méndez.