Un total de 128 condenados por delitos relacionados coa seguridade no tráfico rodado participaron no que levamos de 2015 en 5 obradoiros de educación viaria promovidos pola Xunta de Galicia.

 O Goberno galego, a través da Consellería de Presidencia, Administracións Públicas e Xustiza, asinou un convenio de colaboración co Ministerio de Interior  para o cumprimento das penas de traballo en beneficio da comunidade. En base a este  convenio a Consellería, en colaboración coa Asociación de Criminólogos de Galicia (CRIGA), durante o ano 2015 levou a cabo os ditos obradoiros nas cidades de Ourense, Ferrol, e Santiago.

 As prazas foron distribuídas, baixo a responsabilidade de Institucións Penitenciarias, previa entrevista dos penados para determinar a actividade máis axeitada a cada un deles, e segundo as súas características persoais, a súa capacidade laboral e a súa contorna social, persoal e familiar. A execución da actividade desenvólvese baixo o control do xuíz de vixilancia penitenciaria e dos servizos sociais de Institucións Penitenciarias. Os talleres constaban dunha fase formativa e outra de realización de actividades de utilidade pública.

 Estes cursos puideron desenvolverse grazas á modificación da Lei Orgánica 10/1995 do 23 de Novembro do código penal, que entrou en vigor no ano 2010. O cambio posibilitou que os traballos en beneficio da comunidade poidan consistir na participación do penado en talleres ou programas formativos ou de reeducación, laborais, culturais, de educación vial, sexual e outros semellantes.

 Grazas a este nova iniciativa á posible avanzar na bondade do sistema que permite que baixo concretas circunstancias, a pena consista en traballos en beneficio da comunidade, o que reporta non só un aliciente para o penado en aras a súa futura conduta, senón que reverte na comunidade como prestataria dos seus servizos.