Hoxe venres, 18 de decembro, arranca unha exposición de escultura e pintura do colectivo artístico NEOS na sala de exposicións do pazo de Mos. Este colectivo artístico agrupa a varios artistas que emplean distintas disciplinas en pintura e diversos materiais na escultura. Entre os seus integrantes, que proceden na maioría do sur de Galicia aínda que tamén os hai doutras provincias, atopamos nomes coma Marisa Magallanes, “El Kidagufa”, Juan Rial, Lucía Iglesias, Elisa Rodríguez, José Luis Miranda, Cris Amoedo, Victoria Palencia, Ana Crespo ou Santi Vaz, entre outros.

A exposición será inaugurada ás 20:00h polos “Marqueses de Mós”, os mesmos personaxes que protagonizan a festa de recreación histórica “Arde o Pazo”, xa que entre os cuadros expostos estará un lenzo que o pintor Chicho Solveira iniciou durante a súa participación no mercado da pasada edición desta festa. O artista rematou a obra no seu taller de Nigrán, ultimando os detalles do retrato dos marqueses xunto a outros personaxes da obra teatral da festa e co pazo de Mos ao fondo.

No acto inaugural tamén está prevista a participación de varios poetas e artistas locais. Como presidente da Asociación Cultural “Festa da Prehistoria” e como escultor incorporado ao grupo NEOS, quero animar a tódolos veciños a visitar esta mostra que permanecerá na sala ata o 16 de xaneiro cun horario de apertura de 17:00h a 21:00h.