Lourdes Moure Varela, do Partido dos Socialistas de Galicia-PSOE, e Pedro Ocampo Cardalda, de EU-Son, tomaron posesión como novos concelleiros no Pleno da Corporación do Porriño na xuntanza extraordinaria deste martes, 22 de decembro. Lourdes Moure ven de substituír a Raúl Francés e Pedro Ocampo a Ricardo Canosa, que presentaron a súa dimisión o pasado mes de novembro.

O Pleno, dirixido por Manuel Carrera, como alcalde accidental, ante a ausencia da alcaldesa, Eva García de la Torre, a quen un proceso gripal non lle permitiu presidir a xuntanza da Corporación, deu o seu visto bo, entre outras cuestións, á aprobación inicial da Ordenanza reguladora das Tarxetas da Estacionamento para persoas con Diversidade  Funcional.

Nos vindeiros días a ordenanza sairá a exposición pública abrindo un prazo de alegacións nas que os grupos municipais, asociacións e cidadáns poderán facer as aportacións e alegacións que estimen oportunas. Algunhas delas xa foron anticipadas polos concelleiros no Pleno, entre outras a axilización da súa solicitude, a tramitación das tarxetas provisionais ou o prazo de vixencia, que a concelleira de Benestar, Soledad Girón, estivo dacordo en que debe ampliarse para “facilitar o seu uso efectivo”.

A Corporación tamén aprobou, solicitar ao Goberno de Galicia o traspaso da parte urbana da Estrada PO-329, que transita polas rúas Progreso e Bos Aires, coa finalidade de proceder ao arranxo e humanización da mesma, que abranguería non so o acantoamento en superficie- coa mellora de beirarrúas, pavimentación ou puntos de iluminación- senón o cambio das canalizacións de auga e do saneamento.

O proxecto requirira un investimento superior a 1,5 millóns de euros que o Pleno estivo dacordo en que fose asumido polo Goberno de Galicia, ben mediante a realización directa das obras, anterior á súa entrega á finalización das mesmas, ben mediante a transferencia ao Concello do Porriño coa súa correspondente partida orzamentaria.