A exposición “Cartas de Amor” contra a violencia de xénero chega ao Centro Cultural do Porriño, onde poderá ser visitada ata o 10 de xaneiro. Trátase dunha mostra gráfica para sensibilizar á poboación máis nova sobre a existencia de violencia na súa forma de relacionarse, axudar a detectala e a erradicar as formas de relación violentas.

“Cartas de Amor” é unha iniciativa da Secretaría Xeral de Igualdade. Reúne unha mostra do cómic galego sobre violencia de xénero, con debuxos de artistas como Miguel Calatayud, Patricia Castelao, Fausto Isorna, Pirusca, José Luis Mendez, Jack Mircala ou Javier Olivares. Con esta selección de obras a Secretaria Xeral de Igualdade pretende motivar a reflexión sobre o paralelismo entre o mundo romántico das primeiras  relacións de parella e a crueldade que, ás veces, vai asociada a elas, ante o incremento de casos de violencia verbal ou física nas relacións de parella entre adolescentes.