O portavoz de ACIP, Juan Carlos González Carrera, lamentou que o Goberno Local de Ponteareas “antepoña os intereses da Deputación de Pontevedra, á construción da nova escola infantil que Ponteareas vén demandando dende hai tempo”.

González Carrera fixo estas afirmacións logo de que no último Pleno da Corporación, o grupo de Goberno “votase en contra dunha moción dos independentes nas que se pedía que a Deputación Provincial, ante as dificultades económicas do Concello, achegase os cartos que tiña que poñer a administración local para a posta en marcha da nova escola infantil”.

O convenio inicial, aprobado no ano 2014, sinalaba que a Xunta de Galicia “achegaría o 60 por cento do financiamento necesario para a construción da escola infantil; a Deputación de Pontevedra,  poñería un 20% e o Concello de Ponteareas, o 20% restante”.

Lembra porén ACIP, que o Concello de Ponteareas leva asumindo “dende hai moitos anos, servizos que non lle corresponden”, polo que se debería solicitar a modificación do anterior convenio “e que sexa a Deputación de Pontevedra a que achegue o 40% do diñeiro necesario para a construción, excluíndo ao Concello de pagar cantidade algunha”.

Amais, o portavoz de ACIP considera que, se a nova escola infantil, entra a formar parte da Rede de Escolas da Xunta de Galicia, “o Concello tan só debería asumir o costo dos nenos e nenas do noso municipio”.

En todo caso, non deixa de “estrañarlle” González Carrera, o feito de que “na lexislatura pasada os grupos que agora forman o Goberno local, insistiran unha e outra vez sobre o 'prioritaria' que era a escola infantil municipal” e agora, unha vez que están no Goberno, afirma o portavoz de ACIP “esquécense de tal prioridade cando o certo é que a situación segue a ser a mesma: nais e pais engrosando a lista de espera da actual escola infantil por falta material de prazas”.

Juan Carlos González Carrera afirma que “parece estar claro que se trataba de pedir e esixir cando se estaba na oposición e cando a Diputación tiña unha cor política distinta a súa”. Unha vez que se chega ao Goberno, engade o portavoz de ACIP, “e a Deputación está cogobernada polo seu partido, cambian as prioridades e supedítanse os intereses dos veciños e veciñas aos intereses partidistas”.

ACIP, afirma o seu portavoz, “seguirá facendo o mesmo que fixo dende os seus comezos, poñer os intereses da veciñanza por enriba de todo o demáis”. Son os veciños e veciñas “os que nos puxeron onde estamos para que defendamos os seus dereitos, e iso faremos sexa quen sexa o que goberne na provincia ou en Galicia”, conclúe González Carrera.