A Asociación de Familiares de Enfermos de Alzheimer e outras Demencias de Galicia, Afaga, organizou o espectáculo benéfico de monólogos ‘Non te esquezas de rir’. A cita será o domingo 24 de xaneiro no Auditorio do Teatro Afundación, ás 19:00 horas.

Javier Coronas será novamente o mestre de cerimonias deste divertido espectáculo que contará coas actuacións de David Broncano, Quequé e Oswaldo Digón. Todos veñen coa intención de facernos pasar un bo intre, á vez que nos solidarizamos coas persoas que padecen enfermidades neurodegenerativas e cos seus familiares. A recadación destinarase á posta en marcha de novos programas dirixidos a persoas afectadas por Alzheimer e aos coidadores/as.

De forma gratuita e desinteresada, os humoristas colaboran por segundo ano consecutivo coa Asociación de Familiares de Enfermos de Alzheimer e outras Demencias de Galicia

Un gran xesto destes profesionais que se envorcaron con esta iniciativa que ten como obxectivo principal, ademais de facernos pasar unha divertida tarde, apoiar a un colectivo que aumenta en número cada ano, posto que as cifras de afectados por Alzheimer crecen progresivamente. Trátase dunha enfermidade progresiva e discapacitante, polo que enfermos e coidadores enfróntanse a situacións moi complicadas no seu día a día, a medida que a enfermidade avanza, e por iso necesitan todo o apoio que podamos darlles.

As entradas só custan 12 euros e véndense en Servinova, a Central de Espectáculos de Vigo e o Centro de Atención Integral de Afaga, situado en Martínez Garrido, 21. Interior.

‘Non te esquezas de rir’, será o 24 de xaneiro no Auditorio do Teatro Afundación, Marqués de Valladares s/n. Hora: 19:00. Custo das entradas: 12 euros anticipada, 15 euros en taquilla.