A concellería mosense de Participación Cidadá que dirixe a edil Kely Monzón promove un obradoiro coa finalidade de mellorar as habilidades e capacidade cognitivas dos maiores do municipio titulado “Exercitando a nosa mente”.

O obradoiro céntrase no traballo das habilidades psicomotrices e cognitivas dos maiores, partindo do obxectivo principal de fomentar a súa autodeterminación e independencia. Outros dos obxectivos son promover a calidade de vida das persoas maiores do municipio de Mos, impulsar a participación das persoas maiores, favorecer a integración das persoas da terceira idade na vida do municipio, establecer relacións sociais positivas e previr a soidade e propiciar o mantemento das capacidades cognitivas, persoais, físicas e sociais das persoas maiores.

Poderán beneficiarse desta iniciativa todas aquelas persoas empadroadas no Concello de Mos, maiores de 65 anos, ou pensionistas maiores de 55 anos.

As diversas actividades das que consta o obradoiro levaranse a cabo no Multiusos das Pozas de Mos, situado na parroquia de Petelos. Os interesados en participar poderán acceder a esta actividade a través do cumprimento da solicitude que poden obter no departamento de Participación Cidadá, e no Rexistro do Concello ata o 9 de febreiro, ese día incluído. A lista de admitidos será publicada o 10 de febreiro. As actividades realizaranse todos os xoves pola mañá dende febreiro a abril. Concretamente os días 11, 18 e 25 de febreiro; 3, 10, 17 e 31 de marzo; 7, 14 e 21 de abril, sendo o horario de 12:00 a 13:30 horas.

Este obradoiro de actividades para as persoas maiores seguirá unha dinámica activa e participativa, polo que se intentará motivar aos destinatarios propoñendo diariamente actividades variadas e atractivas de estimulación cognitiva.

Para estimular o desenvolvemento cognitivo realizaranse talleres abertos a todo tipo de variantes (exercicios de memoria, de atención, cálculo, escritura, lectura, expresión plástica, estimulación dos sentidos, orientación espazo- temporal, linguaxe, etc.). Todo adaptado ás idades e destrezas dos participantes.

Mediante a realización destas actividades, e seguindo a metodoloxía proposta, conseguirase establecer lazos de comunicación entre os/as participantes, intercambiando experiencias e opinións; atribuíndo así unha maior riqueza e complementariedade ás actividades. Ademais, este obradoiro pretende ser unha fonte de estimulación intelectual e psicomotor, de forma que sexan motivadoras e que inciten a participar de forma activa.