Para os socialistas, este Plan "proxecta un crecemento urbano inxustificado, insostible e inviable que pretende convertela noutro satélite urbano carente de personalidade e atractivo local".

"Queremos que o PXOM reflexe un crecemento medioambientalmente sostible, dirixido exclusivamente á mellora da calidade de vida dos veciños e veciñas e que sexa economicamente viable. E por suposto, acadando para elo o imprescindible consenso cos axentes do sector, coas asociacións representativas de Salceda e cos veciños e veciñas”, afirma Tourón.

"No PSOE consideramos que o proxecto do PXOM proposto polo Goberno Municipal non reflexa a situación real de Salceda. Basease nunhas proxeccións de incremento de poboación e demanda de vivenda que non responden á realidade e só serven para xustificar o seu proxecto de crecemento 'desarrollista', insostible, desmesurado e innecesario.  Pretende que Salceda de Caselas incremente o seu parque residencial nun 49%, basicamente cun incremento desmesurado do casco urbano, conforme a un modelo de 'boom inmobiliario' obsoleto, desprestixiado e que tan nefastas consecuencias ten tido para o urbanismo en xeral e para cada cidadán en particular" asegura.

“Este Plan condena a Salceda a un modelo de desenvolvemento desfasado de alturas e formigón, sen nin sequera definir un modelo económico para a vila, que sería o prioritario", subliña a portavoz socialista Verónica Tourón, “necesitamos un PXOM cunha estratexia de desenvolvemento que aposte pola innovación e a eficiencia, por un desenvolvemento sostible e niso debemos estar de acordo todos e todas”.

Gela Ledo, concelleira socialista afirma que “este proxecto de PXOM esquece que existen outros modelos que están máis acordes coa esencia do que aínda hoxe é Salceda, e que especialmente nos están transmitindo neste período de suxerencias os nosos veciños e veciñas”.

En palabras da portavoz socialista, “a suxerencia do noso grupo é unha emenda á totalidade do Plan, que esixe que o goberno municipal se sente a dialogar e realice os cambios necesarios para que este PXOM sexa asumible”.

Dende a executiva socialista avanzan, que unha vez pasado o Entroido farán charlas informativas en cada unha das parroquias para explicar o contido do PXOM.