A concellería de Participación Cidadá do Concello de Mos, dirixida pola edil Kely Monzón, dando continuidade ó  programa denominado “Tempo de Lecer”, oferta obradoiros para as asociacións veciñais, culturais, xuvenís, de mulleres, etc., que o desexen, dando así resposta á gran demanda por parte destes colectivos, e co fin de conseguir unha mellora do uso e disfrute do tempo libre dos participantes, a través da aprendizaxe, do traballo en equipo e do fomento da creatividade nos diferentes campos de actuación social.

Cada asociación que queira participar debe cumprir, entre outros, os seguintes requisitos: estar inscritas no Rexistro de Asociacións do Concello de Mos, non ter débedas co Concello e dispoñer de local propio axeitado e dos equipos e materiais precisos para realizar as actividades solicitadas.

Ofertaranse un listado de diversos obradoiros, diferenciados por áreas, e será a asociación a que elixirá nos que desexa participar, así como a data e o horario, entre os meses de marzo e novembro, parándose no mes de agosto por vacacións.

As asociacións terán de prazo dende o 19 de xaneiro ata o 13 de febreiro para entregar no Rexistro do Concello a solicitude de participación no programa Tempo de Lecer co nome dos cursos que lles interesan e as datas de comezo; a resposta por parte do Concello respecto á admisión no programa, será a partir do 20 de febreiro.

Toda a información referente ás bases e ó listado de obradoiros, pódese consultar na páxina web do Concello, www.mos.es,  ou na oficina da OMIX, ubicada no Multiusos das Pozas.