Onte rematou o taller de habilidades e competencias para persoas cunha idea empresarial que se levou a cabo na Axencia de Colocación de Mos que dirixe o concelleiro mosense de Promoción Económica, Emprego e Novas Tecnoloxías, Óscar Soto.

Ao longo de tres días, 43 emprendedores tiveron diversas charlas informativo -formativas, que abarcaron dende a análise das habilidades e capacidades de cada emprendedor ata os trámites necesarios para crear unha empresa ou unha sociedade laboral ou cooperativa. Todas as xornadas que se desenvolveron dende o pasado mércores día 3 de febreiro ata hoxe están incluídas na programación informativa dirixida a emprendedores dá Axencia de Colocación, do Plan Integrado de Emprego MOS 3.0 e dos Obradoiros de Emprego con actividade neste momento (Mos coa Mocidade e Mellorar Mos). Esta programación forma parte da Aula de Emprendedores, e é denominada EmprendeMos.

O día 3 de febreiro, o técnico do Igape, Fernando Álvarez, informou a 43 emprendedores do Concello de Mos, sobre os recursos dos que dispón o Instituto Galego de Promoción Económica para apoiar ós emprendedores cunha idea empresarial, no estudo desa idea, na elaboración e titoría do plan de empresan a través da Unidade Galicia Emprende, e todas aquelas axudas, subvencións e préstamos subvencionados, que lle permiten ó emprendedor financiar parte do seu investimento inicial.

A primeira sesión estivo dirixida por Ana Vázquez, Axente de Emprego e Desenvolvemento Local do Concello de Mos, e tivo como obxectivo que os emprendedores asistentes reflexionasen sobre as súas competencias emprendedoras e habilidades, así como avaliar a súa idea empresarial no entorno no que pretenden desenrolar a actividade.

Para a sesión seguinte, contouse coa colaboración da Asociación Intersectorial de autónomos e pequenas empresas de Galicia (APE), cuxo asesor, Enrique Domínguez Lino, economista e consultor de negocio, impartiu unha conferencia sobre as características do emprendedor que quere darse de alta como autónomo, das vantaxes e inconvintes desta figura, e sobre toda a información fiscal, económica e laboral que necesitan coñecer.

Na última sesión celebrada onte interveu o colaborador, Xosé López, emprendedor do municipio de Mos, a piques de crear a súa empresa , unha consultora de empresas, chamada Do Pazo Consultores Asesores, que se encargou de informar a todos o alumnos/as sobre os diferentes temas a ter en conta á hora de crear unha empresa, en canto a fiscalidade, plans de viabilidade, formas xurídicas, etc.

 
Tamén se contou coa colaboración de Sinerxia e  Unión de Cooperativas de Ensino de Traballo  Asociado  de Galicia  (UCETAG), a cargo de Teresa Balado Barciela. A súa charla ía dirixida a informarlle aos/as alumnos/as sobre as singularidades de emprender en colectivo, a importancia do plan de empresa cooperativo,  e as oportunidades ou vantaxes de utilizar este modelo de empresa para lestes alumnos/as relacionados cos ámbitos de lecer e tempo libre, xestión ambiental, carpintería e obras e xardinería, a parte doutras de diferentes sectores.