O conselleiro de Sanidade, Jesús Vázquez Almuiña, vén de manter unha reunión co alcalde de Pontevedra, Miguel Anxo Fernández Lores, para analizar a situación da sanidade na cidade de Pontevedra e a súa contorna. Durante a xuntanza, de carácter cordial e na que tamén estiveron presentes o xerente do Sergas, Antonio Fernández-Campa, e o concelleiro de Infraestruturas, César Mosquera, coincidiuse en que a asistencia sanitaria nesta área está a un bo nivel, aínda que hai unha marxe de mellora na que se debe afondar.

A Consellería propuxo ao Concello traballar nun proxecto a medio e longo prazo para mellorar a asistencia e adaptala ás necesidades actuais e futuras dos cidadáns da área de Pontevedra. Neste eido, púxose sobre a mesa a situación actual de infraestruturas sanitarias da zona como os hospitais de Montecelo e o Provincial, e analizouse o punto no que se atopa actualmente o anteproxecto do Hospital de Monte Carrasco.

A este respecto, Fernández Lores trasladou ao conselleiro as dificultades que supón este anteproxecto para o Concello no que se refire á urbanización da contorna e a dotación de servizos.

Máximo consenso

Vázquez Almuiña transmitiu ao alcalde a súa intención de desenvolver un proxecto co máximo consenso posible, sen desbotar polo de agora ningunha das solucións propostas. Subliñou o compromiso de buscar a mellor solución acadando o acordo e captando as sensibilidades de todos os ámbitos sociais, tanto no que se refire aos profesionais e aos seus representantes -como grandes coñecedores do sistema e capaces de achegar propostas de mellora- como aos cidadáns, aos que se debe o sistema sanitario; co obxectivo tamén de acadar o máximo acordo dos representantes municipais de Pontevedra, xa que considera imprescindible a colaboración da Administración local para levar a cabo calquera gran actuación no eido das infraestruturas sanitarias.