O desbordamento do río Tea en Ponteareas está a causar numerosas incidencias no concello pontevedrés. A acumulación de auga nos garaxes e baixos de varias vivendas foi o motivo polo que un total de oito persoas tiveron que ser desaloxadas dos seus domicilios.

Un dos propios implicados chamou ao 112 Galicia para solicitar axuda, posto que se atopaba no primeiro andar da súa vivenda, sen poder saír e sen subministro eléctrico. Os Bombeiros do Baixo Miño e Ponteareas, ataviados con embarcación, puideron acceder ás vivendas anegadas e realoxar aos residentes nun hotel da vila. Indicaron, ademais, que os niveis do río Tea continuaban moi altos e que as parroquias de Moreira (onde se produciron os desaloxos) e Freixa seguían a estar completamente anegadas. Pese a todo, ninguén resultou afectado.

A presenza de balsas de auga en estradas e o anegamento de rúas, vivendas e garaxes tamén se deixaron notar en concellos como A Lama, Cangas, Poio, Mos, A Estrada, As Neves, A Cañiza, Salvaterra de Miño e Pazos de Borbén. Ademais, os efectivos de emerxencias locais seguen a comprobar o comportamento dos caudais dos ríos en zonas de toda a xeografía galega.