No marco do Plan Concellos, o novo modelo da institución provincial que converte ós municipios en protagonistas, a Deputación de Pontevedra está a poñer a disposición dos 60 concellos da provincia 40 millóns de euros distribuídos en catro liñas de axuda: investimentos, necesidades de gasto corrente, actividades culturais, deportivas, sociais, turísticas e medioambientais e axudas para financiar o emprego. En dous meses de 2016, a institución provincial, tal e como subliñou a súa Presidenta, repartiu máis de 10 millóns de euros, é dicir, o 25% do total do Plan Concellos.

A Xunta de Goberno da Deputación de Pontevedra ven de aprobar a concesión dun millón de euros en axudas do Plan Concellos destinadas, tal e como informou Carmela Silva “a 13 concellos da provincia para subvencionar actividades, pagar acredores de investimento e gasto corrente e contratar a 109 traballadores”.

En concreto, Silva informou da aprobación da segunda relación de subvencións para actividades culturais, deportivas, sociais, turísticas e medioambientais incluídas na liña 3 do Plan Concellos, beneficiando a Baiona, Caldas de Reis, Cotobade, A Estrada, Meaño e  Portas, que recibirán preto de 90.000 €. Con esta segunda relación de subvencións, son xa máis de 440.590 € os destinados a 24 concellos da provincia de Pontevedra.

Amais, a Presidenta da Deputación manifestou que se aprobou a cuarta relación de subvencións para o gasto corrente incluídas na liña 2 do Plan Concellos, beneficiando a Oia e Salvaterra de Miño, que recibirán 135.600 € para poder pagar a acredores de investimentos e facturas. Con Oia e Salvaterra son xa 15 os concellos que recibiron 1.235.600 € para destinar o gasto corrente.

Finalmente, Carmela Silva indicou que na Xunta de Goberno, aprobouse a cuarta relación de subvencións para o fomento do emprego (liña 4) por valor de 896.131,19 € beneficiando a cinco concellos da provincia que poderán contratar a 109 traballadores : Pontecesures, Redondela, Soutomaior, Vilagarcía e Vilanova de Arousa. Con esta nova relación de subvencións aprobadas son xa máis de 8,4 millóns de € investidos no fomento de emprego, beneficiando a un total de 57 concellos e contratando a máis de 1.142 persoas.

En concreto, Pontecesures recibirá 80.919,47 € para contratar a 3 peóns de obra pública, 2 peóns de auxiliares de xardinería, 3 peóns de limpeza de edificios e fachadas e 1 técnico de protección civil. Redondela recibirá 252.025,04 € para contratar a 2 peóns de limpeza, 1 peón ferreiro, 1 peón carpinteiro, 1 peón electricista, 1 peón fontaneiro, 2 peóns albaneis, 2 peóns teitadores de asfalto, 3 administrativos, 4 ordenanzas, 4 conserxes, 3 guías turísticos e 1 técnico en control ambiental e 2 administrativos. Pola súa parte, Soutomaior recibirá 106.688,21€ para contratar a 2 oficiais de 1ª albaneis, 4 peóns de obra pública en xeral, 1 fontaneiro, 3 peóns forestais e 2 auxiliares de biblioteca, 2 oficiais de 2º albaneis, 1 peón de obra pública en xeral e 2 peóns forestais. Vilagarcía de Arousa recibirá 325.756,52 € para contratar 2 administrativos, 1 monitor ou animador deportivo, 1 condutor operador de retroescavadora, 10 axudantes albaneis, 4 peóns forestais, 3 pintores, 4 instaladores electricistas, 1 carpinteiro en xeral, 2 fontaneiros, 1 soldador e 5 traballadores de conservación de parques. Finalmente, Vilanova de Arousa recibirá 130.741,95 € para contratar 7 peóns de obra pública, 2 albaneis, 1 carpinteiro, 1 fontaneiro, 1 soldador, 1 chofer, 2 tractoristas, 1 palista, 2 conserxes e 1 animador e  3 peóns.