A conselleira de Infraestruturas e Vivenda, Ethel Vázquez, salientou esta semana que as axudas á rehabilitación de vivendas nos Camiños de Santiago representan unha oportunidade única para mellorar as condicións de vida no rural e dinamizalo. Así o dixo durante a súa participación esta tarde nunha das xornadas organizadas para informar aos veciños dos 18 concellos polos que pasa o Camiño inglés sobre o contido do programa ‘Vivendas do Camiño’.

Ethel Vázquez destacou que este programa supón unha gran oportunidade para a dinamización económica do rural galego e constitúe a maior aposta pola rehabilitación de vivendas no Camiño de Santiago, “que forma parte esencial da identidade de Galicia e é o principal recurso de captación de viaxeiros a nivel internacional que posuímos”.

A conselleira, que estivo acompañada do alcalde de Cabanas, Germán Castrillón, destacou que a través desta liña de axudas, a Xunta financiará ata o 35% das actuacións, cun máximo de 11.000 euros por vivenda. Ademais, explicou que as subvencións cubrirán as obras destinadas a illar mellor as vivendas da humidade, a mellorar a seguridade ou a facer os fogares máis accesibles.

Segundo explicou, habilitaranse tamén axudas para a restauración de infravivendas rurais, onde se financiará ata o 80% do custo das actuacións (cun máximo de 12.000 € por inmoble).

Na súa intervención, a conselleira asegurou que o seu departamento está a traballar en coordinación coa Dirección Xeral de Patrimonio para que axilicen os informes necesarios para a obtención as axudas.

Ethel Vázquez explicou que as reunóns informativas como as de hoxe pretenden ofrecer información detallada sobre unhas axudas á rehabilitación que traerán máis de 3 millóns de euros de fondos públicos ao rural galego e que inducirá investimentos por valor de 9 M €.

A responsable de Vivenda do Executivo autonómico dixo que “tamén estamos a incidir na posta en valor da paisaxe galega, facendo fincapé na excelencia turística e dámoslle un novo pulo ao noso rural, fixando poboación e traendo riqueza e emprego ás parroquias e vilas polas que discorren os camiños”.

Despois da Visita a Cabanas, o técnicos do Instituto Galego da Vivenda e Solo desprazáronse ata a localidade Pontedeume, e nos vindeiros días as charlas celebraranse en Mesía e Boimorto e no resto municipios polos que atravesa o Camiño Inglés para explicar en detalle estas subvencións.

Dese xeito estanse a manter encontros nos 107 concellos que integran a Área de Rehabilitación Integral dos Camiños de Santiago para presentar as axudas do programa da Xunta, Vivendas do Camiño. Cada semana técnicos do Instituto Galego da Vivenda e Solo (IGVS) estanse a desprazar aos distintos concellos situados na traza das rutas xacobeas para impartir charlas informativas.