O concelleiro de Deportes e primeiro tenente de alcalde do Porriño, adiantou este mércores que asinará un convenio de colaboración coa Federación Galega de Deporte Adaptado (FGDA) para que a vila sexa a sede permanente da Liga Galega de Baloncesto.

Manuel Carrera fixo o anuncio durante a súa asistencia á primeira xornada da Liga Galega de Baloncesto que se disputou  no Pabillón Municipal.

Carrera salientou o “magnífico traballo” que levan a diante adestradores, directivos e, “especialmente, os deportistas” que contenden a este campionato que terá a súa segunda xornada, en maio e a terceira, en outubro deste 2016, “todas elas no Porriño”.

Nesta primeira parte da competición participaron 17 equipos e 170 xogadoras e xogadores procedentes de toda Galicia, un número que, lembrou o tenente de alcalde, supera o de edicións anteriores, confirmando o aumento constante de practicantes desta modalidade.

Manuel Carrera tamén informou de que o vindeiro día 21deste mes, en colaboración co Clube AMFIV, o Concello organizará o ‘III Torneo Solidario Concello do Porriño’ de Baloncesto en Cadeira de Rodas. O mesmo se desenrolará  na forma 3x3 e estarán presentes algúns dos mellores xogadores desta disciplina.