Un percebeiro perdeu a vida tras sufrir un paro cardíaco cando traballaba en Cabo Silleiro, en Baiona. Sucedeu arredor das doce e media desta mañá e, pese aos intentos dos servizos sanitarios de urxencia, nada se puido facer por salvar a vida do home. O percebeiro, que estaba nas rochas, foi rescatado e trasladado ao Aeroporto de Peinador pola tripulación do Pesca-I. No Aeroporto de Vigo agardaba un equipo de Urxencias Médicas, que, pouco despois, confirmou o falecemento do paciente.

Tras a chamada ao 112 Galicia dun membro da Confraría de Baiona, os xestores do Centro de Atención ás Emerxencias puxeron en marcha un operativo de rescate no que, ademais do Pesca-I e os servizos médicos, participaron Salvamento Marítimo, os integrantes do GES do Val Miñor e as forzas da orde.