O concelleiro de Vías e Obras mosense, Luis Alonso, supervisou onte os traballos de pintado das áreas de aparcadoiro, prazas de aparcadoiro para minusválidos e pasos de peóns en diferentes zonas do municipio; e que deron comezo esta mañá no entorno do Pavillón Óscar Pereiro e da Piscina Municipal.

Estes labores  levaranse a cabo tamén na Urbanización de San Eleuterio, o Centro de Saúde no Rebullón e o Camiño de San Cosme, na parroquia de Cela. Está previsto que os traballos se prolonguen durante unha semana e que queden finalizados cara a mediados da semana que ven.

O orzamento a investir nestas actuacións ascende a 12.000 euros de fondos propios municipais, segundo informaba hoxe o edil responsable do departamento de Vías e Obras, Luis Alonso. Alonso destacaba, así mesmo, “a importancia dos traballos que se están a acometer en aras de optimizar a seguridade vial na localidade mosense, tanto de conductores coma de viandantes, e mellorar en xeral a calidade de vida dos veciños e veciñas a través dun bo mantemento e conservación das infraestruturas, dotacións e espazos públicos”.