O Concello de Mos proxecta para o presente ano 2016 dous novos obradoiros de emprego cuxa solicitude xa foi cursada perante a consellería de Economía, Emprego e Industria. A este respecto informaban hoxe a alcaldesa mosense, Nidia Arévalo, e o concelleiro de Promoción Económica e Emprego, Óscar Soto.

Ambas iniciativas levarían por título Obradoiro de Emprego “ConciliaMos” e Obradoiro de Emprego do Sistema de Garantía Xuvenil “Mos Verde”, respectivamente.

“ConciliaMos” é  un programa mixto de formación e emprego, que ten por finalidade mellorar a ocupabilidade das persoas desempregadas maiores de 18 anos, mediante a realización de obras ou prestacións de servizos de interese xeral e social que posibiliten aos alumnos/as participantes a realización dun traballo efectivo que, xunto coa formación profesional para o emprego recibida, relacionada directamente co traballo a desenvolver, procure a súa cualificación profesional e favoreza a súa posterior inserción laboral no mercado de traballo.

O proxecto incorpora formación profesional, ao abeiro dun certificado de profesionalidade, e aúna ao mesmo tempo unha práctica profesional, que permite a realización dun traballo efectivo.

O/A alumno/a – traballador/a, dende o inicio da súa participación no Obradoiro de Emprego, será contratado na modalidade do contrato de formación e aprendizaxe, sendo a súa duración de 6 meses, así como unha única etapa de formación en alternancia co traballo ou a práctica profesional.

As dúas especialidades coas que contará este obradoiro son ‘dinamización social e educativa do tempo libre infantil e xuvenil’ e ‘dirección e coordinación de actividades de tempo libre educativo infantil e xuvenil’. Os alumnos/as-traballadores/as das mesmas levarán a cabo actividades de atención e dinamización educativa de nenos/as menores de tres anos nas Escolas Infantís Galiña Azul do Municipio, prestarán apoio ó Plan Madruga e ó comedor escolar nos Centros de Educación Infantil e Primaria mosenses, porán en marcha un servizo de aopio familiar e de realización de actividades extraescolares, e atenderán necesidades educativas de nenos/as e mozos/as no tempo libre centrándose no alumnado da ESO de cara a evitar o abandono escolar así como problemas condutuais que puideran derivar en expulsións; todo elo orientado e co obxectivo fundamental de posiblitar e/ou facilitar ós/ás pais e nais mosenses a conciliación da vida familiar e laboral.

Dentro deste Obradoiro “ConciliaMos” tamén se levará a cabo un proxecto de posta en valor de espazos públicos e medioambientais do municipio e elementos/estruturas de madeira e mobiliario urbán a ubicar no Parque de Santiaguiño.

Por outra banda “Mos Verde” é un programa mixto de formación e emprego, que ten por finalidade mellorar a ocupabilidade de mozos e mozas inscritos no Sistema de Garantía Xuvenil, mediante a realización de obras ou prestacións de servizos de interese xeral e social que posibiliten aos alumnos/as participantes a realización dun traballo efectivo que, xunto coa formación profesional para o emprego recibida, relacionada directamente co traballo a desenvolver, procure a súa cualificación profesional e favoreza a súa posterior inserción laboral no mercado de traballo.

Os destinatarios deste obradoiro deberán ter unha idade igual ou superior a 18 anos e ser menores de 30 anos,  desempregados/as, inscritos no Servizo Público de Emprego de Galicia, e que cumplan os requisitos establecidos na normativa do contrato para a formación e aprendizaxe ademais do Sistema de Garantía Xuvenil.

O proxecto incorpora formación profesional, ao abeiro dun certificado de profesionalidade, e aúna ao mesmo tempo unha práctica profesional, que permite a realización dun traballo efectivo.

As actuacións que se levarán a cabo durante o mesmo son limpeza en espazos públicos abertos, xestión de residuos urbanos e industriais incidindo na compostaxe e reciclaxe, e control e protección do medio natural (dentro da que sería a primeira liña de actuación do obradoiro); e deseño de productos gráficos  e interpretación e educación ambiental (na segunda liña de actuación).