A Presidenta da Deputación, Carmela Silva, asinou onte o convenio de colaboración coa Presidenta do Pontevedra Club de Fútbol, Guadalupe Murillo, en presenza do alcalde da cidade Miguel Anxo Fernández Lores.
O acordo recolle a aportación económica da Deputación por valor de 160.000 euros para a presente tempada e a cambio o club comprométese a que o logotipo da institución luza na súa equipación do primeiro equipo e no campo de Pasarón ademais de ofrecer aos concellos da provincia entradas para os partidos o través das escolas deportivas municipais  para as categorías inferiores.

Carmela Silva indicou que este convenio, ao igual que os outros acadados cos equipos de elite de toda a provincia, son fundamentais na política deportiva da institución provincial “xa que é un dos servizos máis demandados polos cidadáns xa que non só e apoiar a un equipo senón é apostar por unha forma de vida saudábel para toda a sociedade e un xeito de apoiar a economía das localidades”.

A presidenta da Deputación subliñou que a firma deste convenio no concello de Pontevedra, en presenza do seu alcalde, é porque a institución provincial  “considera que os protagonistas da acción local son os propios alcaldes e alcaldesas e os concellos. Nos queremos tamén que quede claro que ese é o compromiso da nova Deputación cos concellos”.

Por último, Carmela Silva destacou que este apoio vai ser unha constante nos próximos anos e chegou a anunciar “que como ó Pontevedra nos vai dar moitas alegrías nestes anos incluso teremos que ampliar este apoio”.

Pola súa banda, a presidenta do  Pontevedra Club de Fútbol agradeceu a promesa  de Carmela Silva que “dende o primeiro día, nada máis chegar o cargo, nos transmitiu o seu apoio e o seu compromiso co Pontevedra que naquel momento nos tranquilizou e hoxe, finalmente, trasladamos ao novo convenio”.

Pola súa banda, o alcalde Fernández Lores, agradeceu tamén a Carmela Silva a súa deferencia por rubricar este convenio co Pontevedra Club de Fútbol no concello polo que este equipo representa para a cidade e que espera “que este apoio económico da Deputación sirva para que o equipo siga medrando en categorías e que incluso, algún día, poda estar competindo co Celta”.