Mos transformou as súas áreas de lecer á medida dos nenos e nenas, dos maiores, dos veciños e veciñas con mobilidade reducida, á medida das persoas. Dita transformación vense producindo dende que Nidia Arévalo é alcaldesa da localidade mosense e intensificouse durante o último ano, no inicio da que a é calificada pola rexedora municipal e o seu equipo de goberno como “a lexislatura das persoas”.

O deseño dos espazos públicos, sobre todo dos parques e xardíns, cobra unha importancia capital na xestión local en aras de mellorar a calidade de vida dos habitantes do Concello ofrecéndolles espazos de esparcemento e xogo accesibles e seguros.

Deste xeito cómpre destacar accións recentemente realizadas coma os Parques da Auga de Sanguiñeda e As Lagoas (Guizán), a pista de skate e elementos infantís de xogo no contorno do Muntiusos das Pozas (Petelos), a instalación de elementos biosaudables para adultos nos parques de Torroso e Costoias (Tameiga), ou a colocación dunha tirolina no Parque da Pesqueira (Mos), por poñer tan só algúns exemplos.

E a transformación continúa na actualidade, con novas actuacións que o Concello vai realizar de xeito inminente e nas que investirá un orzamento de fondos propios municipais de sobre 10.000 euros. Máis de 2.500 euros deste presuposto irán destinados á instalación no Parque de Sanguiñeda dun columpio dotado dun asento inclusivo, isto é, adaptado para nenos e nenas de 3 a 14 anos de idade que padezan algún tipo de discapacidade.

Trátase dunha estructura de elevado coste polas súas características técnicas e de montaxe, complexas e minuciosas para aportar tódolos requisitos de calidade, seguridade e confort necesarios para os cativos con necesidades especiais.

Os preto de 7.500 euros restantes irán destinados a mellorar os parques do Plantel en Guizán, Inxertado en Louredo e do Centro Cultural de Herville en Cela. En cada unha destas áreas de lecer ó aire libre instalaranse varios elementos biosaudables destinándose uns 2.500 euros a cada parque. Os elementos a instalar serán para realizar diferentes actividades físicas que emulen os deportes do esquí de fondo e do remo, e o xiro dun timón.

Recentemente visitaban o parque do Plantel en Guizán o concelleiro de Parques e Xardíns de Mos, Cándido Pérez, a edil mosense de Medio Ambiente, Julia Loureiro, e o arquitecto municipal; para valorar e decidir a zona idónea de instalación dos elementos biosaudables nesta área de lecer.