O incendio declarado nun camión que transportaba vehículos mantivo cortado durante algo máis dunha hora o acceso á N-550, á A-55 e á A-52, dende a AP-9. Sucedeu pouco despois das once da noite no Porriño. Por fortuna, ninguén resultou ferido, pero arderon por completo seis dos vehículos que transportaba o camión.

Os servizos de emerxencias lograron salvar a cabeza tractora, unha furgoneta e outro turismo. Tras recibir a alerta, o persoal do CAE 112 Galicia activou un operativo no que participaron os Bombeiros do Baixo Miño e os membros de Protección Civil da vila. Tamén foron informados os axentes da Garda Civil de Tráfico, que arredor das 00:45 horas confirmaron que o tráfico estaba completamente restablecido.