Seguindo na liña de avanzar no uso e potenciación das novas tecnoloxías iniciada xa coa xestión administrativa, As Neves actualiza o enderezo do seu portal na rede, rexistrándoo co dominio .gal. Deste xeito, a páxina web municipal pasa de ser www.asneves.com a www.asneves.gal. Páxina, que ademais, cumprindo co presentado no programa electoral, será renovada ao longo deste ano.

Son dúas as razóns que motivan o emprego do dominio galego en internet. Por un lado, a forte aposta pola utilización destas ferramentas que nos ofrece a informática, moi útiles como canle comunicativa e de achegamento entre a cidadanía e o Concello, e, por outro, o compromiso co noso pobo; xa que este dominio naceu hai case un ano e medio froito dunha iniciativa popular.