A Xunta de goberno da Deputación de Pontevedra acordou iniciar os trámites para a contratación, mediante procedemento aberto, dunha empresa que se encargue da xestión e execución do programa “DepoRúARTE” por unha partida orzamentaria de 100.000 euros. As condicións de contratación tamén inclúen a organización do I Certame Xuvenil DepoRúARTE, que clausurará o programa.

De acordo coas cláusulas que rexerán a contratación, a adxudicación levarase a cabo atendendo a un único criterio de valoración, o prezo, ou ben a unha pluralidade de criterios, entre os que figuran o material didáctico, a experiencia e formación do equipo técnico e dos docentes e a posibilidade de ampliar o número de prazas no caso de que exista maior demanda da prevista. O prazo de execución para a totalidade do contrato será desde a súa formalización ata o 31 de outubro de 2016.

Os contratistas interesados na licitación deberán presentar as súas proposicións no Rexistro Xeral da Deputación, ou auxiliares, ou mediante correo. O prazo é de quince días naturais, contados a partir do día seguinte á publicación do anuncio no BOPPO. A Deputación publicará todas as noticias, avisos e documentación relativa ao procedemento no Perfil do Contratante integrado na Plataforma de Contratación do Sector Público do Estado (www.contrataciondelestado.es).

“DepoRúARTE” é unha iniciativa do servizo de Cohesión Social e Xuventude para poñer en marcha unha programación de actividades educativas e de lecer destinadas ao colectivo xuvenil da provincia. O programa está dirixido a mozos e mozas de 14 a 30 anos de idade, empadroados nos concellos de menos de 50.000 habitantes adheridos ao programa..