Onte realizouse a presentación dos actos de celebración do 25 Aniversario da Banda de Gaitas Ledicia de Mos, no salón de sesións do Concello.

Á rolda de prensa de presentación asistiron a alcaldesa de Mos, Nidia Arévalo, a concelleira de Cultura, Sara Cebreiro, e Hipólito Cabezas, director da Banda de Gaitas Ledicia de Mos.

Segundo explicou Cabezas, os actos de conmemoración deste cuarto de século de vida da Banda iniciaranse o sábado 23 de abril pola mañá cunha exposición na que se fará un repaso da historia da agrupación musical Ledicia, na que se exhibirán fotografías tomadas dende o seu nacemento, así coma tódolos premios, trofeos e distincións acadados, e outras lembranzas varias. A mostra estará aberta ao público no Multiusos das Pozas en horario de 11.00 horas a 14.00 horas e de 17.00 horas a 20.30 horas, momento no que dará comezo o concerto, tamén no Multiusos.

Dito concerto foi definido polo propio Cabezas como “unha caixa de sorpresas coa que tentaremos impactar ó público”. “Tratar de sorprender leva sendo a máxima da Banda durante os últimos 25 anos, ben co repertorio ou co uso de instrumentos”, explicou o director.

O concerto do sábado ademais de musical incluirá un espectáculo visual que dende a organización esperan sexa do agrado do público asistente. Ademais será un concerto no que se tratará de que os espectadores vexan a progresión da Banda durante os 25 anos de historia, recuperando incluso pezas que levaban uns 20 anos sen tocar e que decidiron retomalas agora para esta celebración de aniversario. Queren sobre todo que sexa unha xornada de festa e de celebración, para elo invitaron a músicos que pasaron pola Banda ó longo da traxectoria da mesma e que agora se suman novamente a esta iniciativa. O obxectivo da mesma é ante todo o disfrute, tanto do público como dos músicos da Banda e as estrelas convidadas, que tamén as haberá.

Sobre Ledicia a rexedora local mosense, Nidia Arévalo, declarou que “trátase dunha Banda que naceu e creceu no municipio de Mos e que hoxe merece o aplauso e o recoñecemento deste Concello”. Así mesmo manifestou o seu agradecemento á directiva da Asociación Ledicia que axudou para que no seu momento se formase a Banda e aludiu ó currículo meritorio da formación, con grades éxitos e distincións ás súas espaldas.