O alcalde de Nigrán, Juan González, e o edil de Sanidade, Relacións Veciñais e Comercio, Alfonso Vázquez, fixeron entrega a semana pasada no auditorio municipal dos primeiros 30 carnés de aplicador de produtos fitosanitarios ao alumnado que aprobou o exame da convocatoria do pasado mes de marzo no Centro Antena de Panxón.

Dende esta primeira formación, 150 persoas realizaron ou están a realizar este curso para obter esta acreditación, obrigatoria dende novembro de 2015 para poder adquirir e empregar insecticidas, sulfatos ou herbicidas. En maio comezarán outros dous grupos, de 30 persoas cada un, co mesmo obxectivo.

"Era unha demanda que viñan manifestando moitos usuarios de asociacións veciñais e intentamos cubrir todas as peticións cos sucesivos cursos que estamos a organizar dende o Concello", puntualizou González. O rexedor sinalou, ademais, que ofertar esta formación é unha forma de facilitar a obtención da acreditación no propio municipio. "Queremos evitar que as persoas que a precisen, se teñan que desprazar a outras localidades para conseguila".

Esta acción formativa, homologada pola Xunta de Galicia e subvencionada parcialmente polo Concello de Nigrán, consta de 25 horas presenciais, imprescindibles para poder presentarse ao exame e conseguir o apto de cara á expedición do carné de aplicador de produtos fitosanitarios.

Este documento ten un número identificativo da persoa que adquire os produtos fitosanitarios e os puntos de venda deste tipo de substancias deben consignar a entrega dos bens nunha ficha na que se inclúe dito número, de xeito que o comprador pase a ser o responsable da súa correcta aplicación. De non cumprir a normativa, os usuarios poden enfrentarse a multas que, nos casos máis leves, poden variar de 300 a 3.000 euros.