Efectivos do Grupo Especial de Actividades Subacuáticas (GEAS) da Garda Civil localizaron este domingo o corpo do mergullador desaparecido o pasado sábado no entorno das illas Estelas, fronte á costa de Nigrán. Foi ese día, sobre as 19:00 horas, cando un compañeiro seu alertaba a Salvamento Marítimo da súa desaparición que, a partir de aí, puxo en marcha un amplo dispositivo de busca.

No operativo participaron medios acuáticos de Salvamento, da Garda Civil, dos Bombeiros de Vigo ademais doutras embarcacións particulares. Do mesmo xeito, nada mais coñecer os feitos, o persoal do CAE 112 Galicia informou aos efectivos do GES de Val Miñor e de Protección Civil de Nigrán, aos axentes da Garda Civil e da Policía Local que, tras ser alertados, se sumaron ao dispositivo de busca. Tamén, o helicóptero Pesca 1 se ocupou de facer o rastrexo por aire.