A Presidenta da Deputación de Pontevedra, Carmela Silva, acompañada da alcaldesa do Porriño, Eva García de la Torre, asinou onte un convenio de colaboración co Club Balonmán Porriño por valor de 30.000 € para a promoción do deporte e cooperación e colaboración no desenvolvemento de proxectos deportivos que incrementen a formación deportiva, cultural e social dos escolares da provincia de Pontevedra.

En concreto, o convenio asinado esta mañá entre a Deputación de Pontevedra e o Club Balonmán Porriño permitirá que escolares e alumnado das escolas deportivas de balonmán que o soliciten poidan acceder, de xeito gratuíto mediante a expedición das correspondentes invitacións, ós partidos do Club Balonmán Porriño.

Este convenio ven a manifestar o firme compromiso da Deputación de Pontevedra polo fomento do deporte, mais cun club - como así manifestou a Presidenta da Deputación, Carmela Silva-  como o Balonmán Porriño que aposta pola igualdade entre mulleres e homes e que conta cun equipo, o feminino, que compite na División de Honra, a elite do balonmán español.

A Deputación de Pontevedra incrementou o orzamento destinado a deportes nun 9,2% con respecto ó 2015, acadando un investimento de 6 millóns de €, medio millón máis que no exercicio anterior. No que levamos de 2016, a institución provincial dirixiu xa máis dun millón e medio de euros a entidades e clubs deportivos da provincia de Pontevedra, ós que hai que engadir as achegas para deportistas olímpicos e convenios que se están a asinar cos clubs de elite da provincia de Pontevedra, como o Club Balonmán Porriño.