En pleno século XXI, o ataque sistemático que sofre a Clase Traballadora por parte do capital é unha realidade cotiá. Cada vez con máis brutalidade, e coa escusa da crise económica, o sistema tenta anular os dereitos acadados na loita obreira.

Distintos colectivos, sindicatos e partidos políticos de Ponteareas, organizados na Plataforma 1º de Maio, convocan unha manifestación este domingo polo Día Internacional da Clase Traballadora. A manifestación sairá ás 19:00 dende o Concello de Ponteareas e percorrerá diversas rúas da vila.

A Plataforma 1º de Maio anima a toda a veciñanza de Ponteareas e da comarca a manifestarse en defensa dos dereitos da Clase Traballadora.

Lembran tamén, nestes momentos previos a unhas novas eleccións xerais, que sen a plena concienciación das traballadoras e traballadores e a súa loita, nada mudará realmente goberne quen goberne, xa que, como repetidamente recoñecen os nosos mandatarios, o poder non reside actualmente nos gobernos, senón na banca e nos mercados financeiros. Este contexto pode mudar se a Clase Traballadora, auténtica creadora de toda a riqueza, toma conciencia da súa condición e situación, e planta cara ás agresións do capital.