Xosé Represas, alcalde de Ponteareas, e Hortensia Bautista, concelleira de Cultura, recibiron esta mañá, de mans de Rogelio Groba, a obra exclusiva e especialmente dedicada ao Corpus de Ponteareas, A Marcha das Flores, un “agasallo que pretende demostrar o enorme afecto que teño por Ponteareas, un sentimento que sempre preferín amosar máis con actos que con palabras”, tal e como recoñeceu o afamado compositor.

Este “afecto” xa se viu perfectamente reflectido coa realización doutros traballos como a cantata “Corpus en Ponteareas”, elaborada para orquestra sinfónica, ou a obra “Polas rúas de Ponteareas”, deseñada para orquestra de corda, ámbolos dous entregados polo propio Groba ao Concello de Ponteareas en anos anteriores.

A Marcha das Flores é unha obra con ritmo de muiñeira na que a base instrumental é marcada pola percusión. Trátase dun traballo que terá a súa “estrea oficial na vindeira edición do Corpus Christi e que será tocada, cada ano e de maneira exclusiva, na nosa maior festividade”, afirmou o rexedor local, Xosé Represas. A edil de Cultura, Hortensia Baustista, tamén celebrou o feito de que “grazas á xenerosidade do mestre Groba o Corpus teña un punto máis de exclusividade con esta obra”.

Ideada para a procesión desta Festa, a entrega por parte de Rogelio Groba da Marcha das Flores ao Concello de Ponteareas tamén é “unha forma de agradecer o inmenso honor que supón para min o feito de que a actual corporación decidira dedicarme unha rúa no meu municipio natal”.

A actual rúa Darío Bugallal, situada ao carón da Casa do Concello, pasará a chamarse, a partir do vindeiro 30 de abril, rúa Rogelio Groba Groba. O acto oficial no que se descubrirá a placa co novo nome dará comezo ás 19:00 horas e contará coa presenza do propio compositor (Fillo Predilecto de Ponteareas) e da Banda de Música Unión de Guláns, que interpretará a música do mestre.

RESUMO DA TRAXECTORIA DE ROGELIO GROBA
Rogelio Groba Groba naceu en Guláns o 16 de xaneiro de 1930 e dedicou a práctica totalidade da súa vida á música, dándolle a Galicia un pulo importante no eido da chamada “música culta”. Primeiro como instrumentista (na Unión de Guláns), logo como director de bandas (A Unión, as municipais de A Estrada, Tui, Ponteareas, Pedro Muñoz –Cidade Real- e A Coruña, ademais de varias “harmonies” e “fanfares” en Suíza), de coros (a “Masa Coral Estradense”, o “Rosalía de Castro” da Casa Galega en Madrid, “Follas Novas” e “El Eco” en A Coruña), ou de orquestras (a Orquestra do Conservatorio Superior de Música de A Coruña, a Orquestra de Cámara Municipal de A Coruña e, ocasionalmente, a Real Filharmonia de Galicia ou a London Symphony Orchestra).

Foi nomeado Compositor Asociado á Orquestra Sinfónica de Galicia no ano de nacemento desta última. Exerceu, ademais, como profesor de Harmonía, Contrapunto e Fuga, e Composición no Conservatorio Superior de Música de A Coruña, do que foi director durante vinte anos, e fundou numerosos conservatorios dentro da xeografía galega.

Con todo, o seu gran legado é o da composición. Rogelio Groba Groba compuxo, ata este momento, preto de 700 títulos con obras dos máis variados xéneros e estilos, dende pequenas cancións tradicionais ata sinfonías, óperas, cantatas, música sinfónica, de cámara, para banda, entre outras.