A alcaldesa do Porriño, Eva García de la Torre, xunto coa presidenta da Deputación de Pontevedra, Carmela Silva, asistiu este martes á presentación do XIII Festival de Cine de Cans que se celebrará na parroquia porriñesa dos días 18 a 21 deste mes de maio.

García de la Torre reiterou a implicación do Concello co festival que “pon a Porriño no mapa”, e engadiu que nesta edición a intención da Concellería de Cultura, da que tamén é titular, é que Cans chegue a toda a vila e poidan gozar do mesmo todas as veciñas en veciños.

A alcaldesa indicou que ademais da axuda económica, a meirande das trece edicións do festival, o Concello traballou para incrementar a implicación de todos os porriñeses, co desfile de chimpíns polo centro da vila, coa colocación dun ‘dinocan’ diante da Casa do Concello ou a participación das rapazas e rapaces, por medio dos colexios, nunha exposición de debuxos relacionados co festival, visible na zona peonil do Porriño.

A presidenta da Deputación, a primeira responsable do ente provincial que acude á presentación do festival na súa historia, cualificou a ocasión de “salientable para a provincia” polo estar en Cans e porque, como indicou o director do festival, Alfonso Pato, aposta pola visibilización da muller en todos os eidos: coma realizadoras, coma actrices, organizadoras e, coa proxección do documental ‘Cinema e Muller’ e, no caso deste martes, no apoio institucional a Cans, coa presenza da propia Carmela Silva e a alcaldesa do Porriño, Eva García de la Torre.

A presidenta da Deputación agradeceu a implicación de Cans co ‘Ano Castelao’, impulsado polo organismo provincial, que posibilitará que o pensador, artista, médico, escritor, debuxante e político estea presente durante todos os eventos que se realicen no festival.