O portavoz de Grupo Provincial Socialista na Deputación de Pontevedra, Santos Héctor Rodríguez,  amosou a súa sorpresa e estupefacción ante o “descaro sen parangón da alcaldesa de Mos, Nidia Arévalo, que sen rubor algún atreveuse a responsabilizar ao Goberno da Nova Deputación do accidente de tráfico rexistrado nas últimas horas no seu municipio supostamente pola ausencia de pintura no paso de peóns onde aconteceu o sinistro”

Santos Héctor Rodríguez expresou a súa incredulidade ante a grave acusación de Arévalo. “Non dou crédito ante a caradura da alcaldesa de Mos, que ademais é deputada e portavoz do PP na institución provincial, e sen rubor de ningún tipo tenta esconder que o seu partido levaba 35 anos gobernando na Deputación e que deixou as infraestruturas provinciais nun estado de total abandono”. O portavoz do grupo socialista sinalou que “cando o novo goberno tomou posesión, hai só 9 meses, atopouse a rede viaria provincial nunha situación de absoluto desastre. Por iso puxemos en marcha un ambicioso Plan de mantemento que é o Plan Móvese e que ten como obxectivo prestar o servizo aos cidadáns que o PP deixou en estado de desastre porque as súas prioridades estaban onde sempre: a política caciquil e a desigualdade entre concellos dependendo da súa cor política”

Rodríguez expresou o seu malestar “porque é inconcibible que se chegue a utilizar un accidente de tráfico e que se utilice a dor dunha familia polas lesións sufridas. Ata agora só usaban o ruído para tentar desgastar ao novo goberno pero isto é ir máis aló. A actitude da Señora Arévalo é impresentable cando todo o mundo sabe que foi a man dereita do ex Presidente Rafael Louzán, desde asesora a deputada, e que se alguén é responsable da lamentable situación da rede viaria son eles, os anteriores dirixentes da Deputación. Xa basta. É evidente que non asumen que perderon o goberno porque os cidadáns déronse conta dos seus manexos e eles non terminan de asumilo. Parece claro que a Nova Deputación de Pontevedra está a facelo francamente ben. Só así se pode entender a ruindade dos argumentos do PP aos que parece que xa lles vale todo” engadiu