A nosa comunidade é, segundo os datos do Centro Nacional de Epidemioloxía do Instituto Carlos III unha das principais afectadas por legionella dentro de España, sendo, no ano 2014, a terceira con maior taxa de ataque (2,96 cada 100.000 casos tras Cataluña e Cantabria) e presentando (igualada con Cataluña), o maior número de brotes do conxunto das comunidades autónomas. Non se debe esquecer que na nosa comunidade presentáronse casos de brotes cun importante número de afectados como o do ano 2000 en Vigo, cunha trintena de afectados e catro mortos, ou como o do ano 2014 en varias residencias de anciáns da provincia de Lugo.

O corpo de Farmacéuticos Inspectores de Saúde Pública, composto por 62 persoas dependentes da Consellería de Sanidade, é o encargado actualmente de inspeccionar as instalacións capaces de propagar a legionella. Esta difúndese por medio de sistemas que traballan con auga (principalmente quente, pero tamén fría) como torres de refrixeración, condensadores evaporativos, sistemas de auga quente domésticos e de establecementos públicos, spas e jacuzzis, sistemas de humectación e climatización, lavados de coches, fontes,...

En Galicia contamos actualmente con 3.339 residencias turísticas (hoteis, pensións, cámpings,……) que inflúen fortemente no turismo e na nosa economía, a estes hai que sumar 1.644 centros educativos (colexios, institutos,….., e un crecente número de pavillóns e campos deportivos, ximnasios, spas, talasos, balnearios, residencias de anciáns, centros de día, hospitais, sanatorios, etc….. Todo sistema que utilice auga pulverizada no seu funcionamento pode propagar a legionella, producindo a enfermidade. 

Todos estes establecementos súmanse a unha carga de traballo cada vez maior, composta de 338 establecementos biocidas, 497 zonas de baño con 517 puntos de móstreo, piscinas de uso público, tanatorios e velorios, centros de tatuaxe, inspeccións relacionadas co tabaco.....

“A simple comparación do número de inspectores e de establecementos a controlar evidencia o crecente abandono ao que está sometida a Saúde Pública polos responsables da Consellería de Sanidade. co risco que iso supón para a saúde de todos os Galegos e galegas” denuncian os sindicatos..

 
“O corpo de Farmacéuticos Inspectores de Saúde Pública non conta cunha estrutura organizativa adecuada, nin cos medios humanos e materiais suficientes para desenvolver o seu traballo. Así, cando se reestruturou o corpo no ano 2006, o colectivo de Farmacéuticos Inspectores de Saúde Pública contaba con 100 prazas, pero a día de hoxe, 10 anos despois, unicamente están cubertas 62. Para paliar esta grave falta de persoal, a Xunta opta por ir diminuíndo máis e máis a frecuencia e a cantidade de inspeccións, o que supón que o risco medre ano tras ano, sen que a poboación chegue a decatarse, o que con leva que non haxa ningunha consecuencia para os responsables” sinalan.

Den de as organizacións sindicais aseguran que todo iso “evidencia a situación de abandono na que está sumida a saúde da poboación galega, sen que a Xunta de Galicia poña os medios necesarios para remedialo, pese ás innumerables advertencias do propio colectivo e das organizacións sindicais”.

Porén CIG, CCOO, CSIF e UGT, esixen que, os responsables da Consellería de Sanidade “dean a cara e informen a cidadanía do perigo real da legionella, así como da situación de risco na que se atopan, por  falta de Farmacéuticos Inspectores suficientes, para atender a actual carga de traballo que coa chegada do bo tempo se incrementa aínda mais”.