Os tres concellos do Val Miñor volverán a pedalear xuntos o 17 de maio, na XXVIII Edición da 'Festa da Bicicleta' cuxa organización recae este ano en Nigrán. O xa tradicional evento, coordinado dende as respectivas concellerías de Deportes  e policías locais, conta nesta ocasión con Nigrán como municipio anfitrión. Así, tódolos participantes confluirán na Ramallosa ás 11:30 horas para ir xuntos ata o pavillón de Panxón.

A festa está organizada e deseñada para todas aquelas persoas maiores de 7 anos que sexan capaces de chegar ao ritmo do pelotón desde os seus diferentes puntos de saída ata Ramallosa e voltar. É obrigatorio o uso de casco e as inscricións e recollida de dorsais farase 30 minutos antes de dar comezo a actividade en cada punto de saída. O número de dorsal dará dereito a participar no sorteo de agasallos.

Nesta ocasión os ciclistas de Nigrán serán os máis madrugadores, xa que partirán ás 10.00 horas dende o pavillón de Panxón cara a Gondomar para recoller ás 10,45 horas aos participantes desde municipio, que agardarán a súa chegada na casa do Concello. A esa mesma hora (10:45 horas) sairán dende o Parque da Palma os ciclistas de Baiona. Todos xuntos se atoparán na Ramallosa ás 11.30 horas para pedalear ata o pavillón de Panxón.