O titular de Economía, acompañado polo delegado territorial da Xunta en Vigo, Ignacio López-Chaves, mantivo unha xuntanza na cidade olívica co director da fábrica de PSA Peugeot-Citroën, Yann Martín, quen lle trasladou un primeiro balance das adxudicacións de compoñentes do K9 a provedores Tier1 e o estado dos plans de futuro da factoría para continuar medrando e xerando emprego en Galicia. Conde amosou a súa satisfacción polos 500 millóns de euros captados pola industria de compoñentes da automoción no modelo K9.

Salientou que os datos trasladados por PSA indican un incremento do 6,3% sobre o anterior modelo

O titular de Economía salientou que a industria de compoñentes de Galicia está a cumprir e a dar resposta ás necesidades do grupo PSA destacando que, segundo os datos trasladados por PSA, o volume de negocio a provedores será de 5.000 millóns nos próximos dez anos e suporá un incremento do 6,3% sobre o anterior modelo. O titular de Economía apuntou que esta cifra é “moi importante nun contexto de altísima competencia” e, así, indicou que Galicia mantén o seu posicionamento respecto ás industrias de compoñentes de Portugal e Marrocos. Neste senso, engadiu que esta industria ten permitido acadar incluso novas pezas que tradicionalmente non se fabrican en Galicia.

Con respecto ao novo modelo polo que está a competir Vigo, destacou a gran oportunidade que supón para consolidar o posicionamento de Balaídos, medrar en carga de traballo e, polo tanto, impulsar o crecemento e a competitividade da industria de compoñentes que ten creado no último ano 1.000 novos postos de traballo.