O programa de actos das Letras Galegas do Concello de Mos inclúe este ano unha mostra fotográfica con obras de Federico de la Peña Santos, titulada Escenarios da Prehistoria. Inaugurarase o día 14 de maio e permanecerá aberta ao público ata o 4 de xuño en horario de 17.00 horas a 21.00 horas de luns a sábado no Pazo de Mos.

A alcaldesa de Mos, Nidia Arévalo, inaugurará o sábado ás 20.00 horas a exposición que declarou espera que teña a máxima acollida de público e que sexa do agrado de todos os asistentes, “xa que se trata dunha mostra moi interesante”, dixo.

Esta exposición no pazo de Mos trata sobre un tema altamente atractivo para o público, como é o da arqueoloxía, un dos bens patrimoniais máis relevantes da nosa provincia, que conta cunha gran riqueza en asentamentos prehistóricos de relevancia.

O obxectivo desta mostra é poñer en valor este parimonio, dándoo a coñecer no Concello de Mos, moi rico tamén en canto ao que a legado patrimonial arqueolóxico se refire.

O coñecemento é esencial para a protección destes monumentos, amosar aos cidadáns a importancia deste patrimonio de todos contribúe á concienciación para coidalo e protexelo.

A exposición divídese en catro grandes bloques temáticos: asentamentos paleolíticos, monumentos megalíticos, petróglifos e castros. Contén sobre 45 marcos e paneis de 40x50cm con fotografías dos 31 xacementos e monumentos prehistóricos máis destacados e espectaculares da provincia de Pontevedra. Inclúe tamén fichas técnicas dos asentamentos e monumentos expostos, detallando as características, localización,etc. ademais de textos explicativos.