Tras a súa sesión de constitución, a Comisión de Estudo do transporte municipal celebrou esta semana a súa primeira reunión na que se iniciaron os traballos a realizar pola mesa de traballo de cara á posta en marcha durante o verán do servizo de transporte urbano pola vía municipal.

Nesta primeira reunión consensuouse o regulamento do servizo, no que se establecen, entre outras directrices de funcionamento, os dereitos e deberes dos usuarios do mesmo, as características que deberán ter os autobuses que presten o servizo, condicións de accesibilidade, etc.

A idea do Concello, compartida por dirixentes e técnicos municipais, así como por todos os grupos da Corporación, é sacar a concesión do servizo por un ano para ver como funciona e se a demanda dos usuarios é real e verdadeiramente son moitos os pasaxeiros.

As rutas e horarios deseñados poderán ser modificados pola administración local como considere segundo se vaian perfilando as necesidades do servizo unha vez este bote a andar. Esta posibilidade de modificación ven xa estipulada no regulamento onte tratado pola Comisión de Estudo.

Outro dos puntos abordados nesta primeira reunión foi o estudo económico de costes que está estimado nuns 45.000 euros anuais polo departamento municipal de Intervención, aínda que para establecer os costes reais hai que esperar a coñecer o volume real de usuarios do servizo e, en función dos mesmos, os ingresos anuais que lle reportará á empresa concesionaria a prestación do servizo en Mos. Ditos ingresos calculáronse agora en base a unha estimación media de 7.000 euros/ano.

A tarifa establecida para o billete do transporte urbano mosense será a máis simple: 0,85 euros. Será un billete único e os usuarios non terán que volver a pagar durante unha hora aínda que fagan transbordo a outra liña tanto do transporte urbano como do interurbano a outros municipios da Área Metropolitana.

Ambos puntos, tanto o regulamento como o estudo económico foron votados favorablemente por todos os membros da mesa e serán aprobados a vindeira semana en Comisión Informativa.

Estes dous puntos constitúen parte da memoria necesaria para que o transporte urbano municipal mosense poida ser aprobado definitivamente en Pleno. Tras a aprobación polo Pleno da Corporación Municipal e ser sometida a información pública durante o prazo dun mes; quedará aprobada definitivamente.

A memoria constitúe o procedemento previo para poder establecer o servizo público de transporte municipal. Tras a aprobación da mesma xa se poderá iniciar o procedemento de contratación da empresa concesionaria.

É dicir, que este é o paso previo para sacar a licitación a concesión, e que tódalas empresas que estean interesadas en optar a xestionar o transporte municipal mosense poidan presentar as súas ofertas culminando coa contratación dunha delas como concesionaria e poñendo en marcha, a continuación, o devandito servizo de transporte; que dende a administración local estímase que será de cara ao vindeiro verán.

Na reunión de onte estiveron presentes a alcaldesa de Mos, Nidia Arévalo, a concelleira de Medio Ambiente, Urbanismo e delegada de Mobilidade, Julia Loureiro, a secretaria, a enxeñeira, e o interventor municipais, así coma representantes dos grupos políticos da Corporación Municipal.

Detalles do servizo de transporte municipal

O proxecto de transporte municipal presentado polo Concello de Mos consiste nun sistema de buses lanzadeira distrubuídos en dúas liñas que comuniquen as dez parroquias mosenses entre sí e coas paradas do Transporte Metropolitano sitas en Puxeiros, Peinador, Tameiga, Sanguiñeda e San Cosme en Cela; o que lles permitirá ós veciños e veciñas de calquera punto da localidade mosense desprazarse no transporte público en igualdade de condicións. Ademais este servizo comunicará cos principais puntos de interese e afluencia veciñal do municipio que son o Centro de Saúde do Rebullón, o Instituto nas Pozas e o Pavillón Óscar Pereiro nas Pozas tamén.

“Este plan correspóndese ó proxecto de transporte municipal que o Partido Popular de Mos presentou como parte do seu programa electoral nos pasados comicios locais”, segundo declaraba a rexedora mosense.

Sobre este Plan de Transporte Municipal Arévalo explicou que constará dun autobús lanzadeira de liña circular que comunicará as 10 parroquias mosenses entre sí e cos puntos de enlace co Transporte Metropolitano, para poder desplazarse ata calquera dos municipios da área.

Ademais de comunicar as 10 parroquias entre sí esta liña comunica a tódalas parroquias mosenses coas zonas de intercambio co Transporte Metropolitano que une Mos coas demais localidades da Área Metropolitana.

Neste sentido, Arévalo destacou a importancia deste plan que conectará as parroquias sen servizo coas paradas do Transporte Metropolitano, garantindo deste xeito a mobilidade de todas as parroquias tanto entre elas como con outros concellos metropolitanos.