Ante un novo 17 de Maio, Día das Letras Galegas, as Comisións Executivas da Unión Xeral de Traballadores de Galicia e do Sindicato Nacional de Comisións Obreiras de Galicia reafirmámonos no insubstituíble papel da lingua galega para a nosa sociedade, tanto na dimensión de vehículo de comunicación como na de valioso herdo cultural. Os traballadores e traballadoras de Galicia asumimos a responsabilidade de coidalo, protexelo e difundilo, como manifestación de cidadanía responsable.

O galego perténcelle a toda a sociedade; é de todas e todos nós, un tesouro colectivo que debe ficar alleo de calquera tipo de confrontación. Están aínda relativamente recentes episodios vergoñentos en que a lingua galega foi utilizada co obxectivo de obter réditos políticos. Cadrando coas eleccións autonómicas do ano 2009, viviuse unha situación de crispación como non se recordaba, chegándose incluso a cuestionar o papel da lingua galega no ensino.

Daquela tempestade vivimos aínda hoxe as consecuencias por culpa o mal chamado Decreto do plurilingüismo, que rebaixou a presenza do galego no ensino, e por culpa tamén da nova lei educativa, a LOMCE, que degradou as linguas cooficiais distintas do castelán.

Ano electoral

Neste ano que será dobremente electoral esiximos que os futuros gobernos estatal e galego derroguen estas dúas normas e, no caso concreto de Galicia, se recuperen os consensos sobre unha cuestión tan importante. O Plan Xeral de Normalización da Lingua Galega, aprobado por unanimidade do Parlamento de Galicia no 2004, ha ser o principio reitor da recuperación dun consenso que xamais se debeu deixar de lado por culpa de intereses espurios. Coa ollada posta nas eleccións galegas do vindeiro outono, esiximos que a lingua sexa un elemento de consenso ou, polo menos, que fique fóra da liorta partidista.

O homenaxeado, Manuel María

Por último, CCOO e UGT alentamos a cidadanía galega a tomar parte nesta permanente e esencial tarefa para lograr a plena normalización lingüística. Instamos, tamén, a todas as traballadoras e traballadores galegos a que se sumen a este compromiso e a que celebren con entusiasmo o Día das Letras Galegas, dedicado este ano ao polifacético escritor Manuel María.

Galicia somos nós,

a xente e máis a fala.

Se buscas a Galicia,

en ti tés que atopala.

Sirvan as palabras do homenaxeado como colofón, pero tamén como reiteración, do que expresamos na presente declaración.